Өскеменнің «Алтайы» КПЛ-2026 маусымында элитада қалды, алайда команда өз міндетін соңғы турда ғана орындады. Маусым басталар алдында клубтың басты мақсаты біреу еді — лигада сақталып қалу.
«Алтай» өткен маусымда Бірінші лигада 14 команданың ішінде үшінші орын алған. Клубтың маусымдық бюджеті 2,446 миллиард теңгені құрады. Командаға берілген мүмкіндікке қарамастан, чемпионат алдында одан көп нәрсе күтілмеді.
Уақыт өте келе өскемендік ұжым лигадағы ең жас құрамалардың біріне айналды. Маусымды небәрі бес легионермен бастаған команда тәжірибе мен жеке шеберлік жағынан көп ұпай жоғалтты. Соған қарамастан, «Алтай» кейбір фавориттерден ұпай алып, басты мақсатқа жетуді білді.
30 турдың қорытындысы бойынша Вахид Масудовтың шәкірттері 6 рет жеңіске жетіп, 10 рет тең түсті және 14 матчта жеңіліп қалды. Команда 31 гол соғып, қақпасынан 42 гол өткізді. Нәтижесінде 28 ұпай жинап, КПЛ-2026 кестесінде 16 команданың ішінде 14-орынға жайғасты.
Өз алаңындағы «Восток» стадионындағы қайта жөндеу жұмыстары да клубқа оң әсер етпеді. Нысан тек мамыр айының басында ғана пайдалануға берілді, ал оған дейін «Алтай» үйдегі матчтарын Алматыда өткізуге мәжбүр болды. Туған қаладағы алғашқы ойынын 10 мамырда өткізіп, сол кездесуде «Ордабасы» командасымен 0:0 есебімен тең түсті.
Кубок Қазақстанында «Алтай» әлдеқайда жарқын әсер қалдырды. 1/8 финалда өскемендіктер «Ұлытауға» қарсы матчта керемет камбэк жасап, қосымша уақытта 2:3 есебімен ұтылып жатқан жерінен 111 және 119-минуттарда гол соғып, 4:3 есебімен жеңді. Одан кейін «Ақтөбені» сырт алаңда 1:1 есебінен соң пенальти сериясында 4:3 ұтып, сенсация жасады.
Абылхайыр Әлиақбар осы кездесуде екі пенальтиді қайтарып, команданың жарқын жеңісіне үлес қосты.
Алайда жартылай финалда «Ордабасы» жолын кесті: «Алтай» бұл кезеңде 1:3 және 1:2 есебімен екі матчта да жеңілді. Соған қарамастан, Кубоктағы бұл нәтиже клубтың маусымдағы ең елеулі жетістігі болып қалды.
Қаржылық мүмкіндігі жағынан «Алтай» әлсіз клубтардың қатарында болған жоқ, бірақ нәтиже мен ойын сапасы бюджетке сай келмеді деген сұрақ көп туғызды. Қолда бар ресурсқа қарамастан, команда соңына дейін элитада қалу үшін күресуге мәжбүр болды. Дегенмен Вахид Масудов бапкерлік ауыс-түйіссіз құраманы сақтап, КПЛ-де қалдыра алды.
