UFC-де Армения намысын қорғайтын ресейлік Арман Царукян (24-3) келесі жекпе-жегі жеңіл салмақтағы чемпиондық белдік үшін өтуі керек екенін айтты. Қазіргі уақытта бұл титул америкалық Джастин Гэтжиге (28-5) тиесілі.
Царукянның сөзінше, ұйым басшылығы оның бразилиялық Маурисио Руффиге қарсы өнеріне разы болып, титулдық айқасты қайта қарастыратынын айтқан.
«Басшылар менің өнеріме риза болды және келесі аптада сөйлесетінімізді айтты. Мен бұл жекпе-жектің алдында олармен сөйлесіп, одан кейін титулдық мүмкіндік аламын ба деп сұрадым. Олар: „Иә“ деп жауап берді.
Бұл менің келесі айқасым титул үшін өтетінін білдіреді. Мен чемпион Джастин Гэтжимен кездескім келеді. Бұл жекпе-жек келесі жылдың басында өтеді деп үміттенемін.
Сондай-ақ Лос-Анджелеске келіп, аренадан қолдау көрсеткен барлық жанкүйерлеріме алғыс айтамын. Махаббаттарыңыз үшін рақмет, мұны шын бағалаймын»— деді Царукян X әлеуметтік желісінде.
Лос-Анджелесте өткен UFC 331 турнирінде Царукян Руффиді бірінші раундта шынтақпен нокаутқа түсіріп, жеңісті сериясын алты жекпе-жекке жеткізді.
Гэтжи Илия Топурияны жеңіп чемпиондық белдікті иеленген еді. Алайда қолындағы жарақатына байланысты оның октагонға 2027 жылға дейін оралмайтыны айтылып отыр. UFC әзірге Гэтжи мен Царукян арасындағы титулдық жекпе-жекті ресми түрде жариялаған жоқ.
