Қазақстан Кубогының 2026 жылғы финалы ертең Түркістандағы «Түркістан Аренада» өтеді. Шешуші ойында шымкенттік «Ордабасы» мен қызылордалық «Қайсар» кездесіп, матч 16:00-де басталады.
Маусым қорытындысы бойынша «Ордабасы» Қазақстан Премьер-Лигасының чемпионы атанса, «Қайсар» элиталы дивизионнан шығып қалды. Осыған қарамастан, ойын алдында көпшілік финалдың тартысты боларына сеніп отыр.
Бұған қатысты пікір білдірген бұрынғы «Қайрат» пен Қазақстан жастар құрамасының шабуылшысы Айдар Аргимбаев «Ордабасы» сапалық жағынан да, құрам жағынан да күштірек екенін айтты. Оның сөзінше, чемпион мен соңғы орын алған команданың арасындағы айырмашылық айқын көрінеді.
«Ордабасы» – финалдың сөзсіз фавориті. Бірақ бір матчта кез келген жағдай болуы мүмкін. «Қайсарға» енді жоғалтатын ештеңе жоқ. Оның үстіне, екі ойында да «Ордабасы» қарсыласын Шымкентте де, Қызылордада да сенімді жеңді. Бұл психологиялық тұрғыдан әсер етуі мүмкін», – деді Аргимбаев.
Оның ойынша, «Қайсардың» сенсация жасауына ең алдымен қарсыласты бағаламау немесе бас бапкер Талғат Байсуфиновтың ойынға дұрыс жоспар құруы көмектесуі мүмкін. Аргимбаев Байсуфинов командаға ерекше жігер бере алатынын да атап өтті.
«Қайсар» үшін бұл финал маусымдағы беделін қайта көтерудің соңғы мүмкіндігі болуы ықтимал. Аргимбаев егер қызылордалықтар Кубокты ұтып алса, оларға көп нәрсе кешірілуі мүмкін екенін жеткізді. Ал өз болжамында ол трофей «Ордабасыға» бұйыратынын айтты.
