Будвада (Черногория) өтіп жатқан 19 жасқа дейінгі боксшылар арасындағы әлем чемпионатының төртінші жарыс күнінде Қазақстан құрамасы екі жеңіс пен екі жеңіліс тіркеді.
54 келіге дейінгі салмақта Жанель Имантаева ширек емес, 1/8 финалда шотландиялық Роси Свейлспен жұдырықтасты. Үш раундтың қорытындысы бойынша төрешілер 3:2 есебімен жеңісті қарсыласына берді. Осылайша, Имантаева әлем біріншілігінен шығып қалды.
70 келіге дейінгі салмақта Бибарыс Аширбай турнирді сәтті бастады. Ол 1/16 финалда аргентиналық Сантьяго Хименес Лоссоны 5:0 есебімен ұтты.
Кешкі сессияда 60 келіге дейінгі салмақта Данияр Ақбисенов грузиялық Сандро Капанадземен 1/16 финалда кездесті. Қазақстандық боксшы тартысты жекпе-жекте 3:2 есебімен жеңіске жетіп, келесі айналымға өтті.
Ал 75 келіге дейінгі салмақтағы Әмір Рамазан өзбекстандық Сухроб Рахматуллаевқа қарсы шықты. Биылғы Азия чемпионы атанған қарсылас айқын басымдықпен 5:0 есебімен жеңді. Рамазан турнирді аяқтады.
World Boxing ұйымының юниорлар арасындағы әлем чемпионаты 16-27 қазан аралығында өтуде. Байрақты бәсекеге 69 елден 474 боксшы қатысып жатыр.
