Қазақстандық мәнерлеп сырғанаушы Софья Самоделкина Алматыда өтетін Денис Тен мемориалы алдында жаттығудан видео жариялап, тройной аксельді қайта жасағанын хабарлады.
Спортшы бұл жазбаны Instagram парақшасына жүктеді. Самоделкина күрделі секірісті қысқа бағдарламаға тура бір күн қалғанда қайта орындағанын айтып, жанкүйерлерінен қолдау сұрады.
«Тройной аксель қайта оралды. Дәл уақытында! Қысқа бағдарлама ертең. Маған сәттілік тілеңіздер!» — деп жазды мәнерлеп сырғанаушы.
Денис Тен мемориалы Алматыдағы «Халық Арена» мұз сарайында өтіп жатыр және 2026/2027 маусымындағы ISU Challenger халықаралық сериясына кіреді. 7 қазанда спортшылар ресми жаттығуларын өткізеді, ал жарыс 8 қазанда басталады.
Самоделкина әйелдер арасындағы жекелей сырғанауда сынға түседі. Оның қысқа бағдарламасы 8 қазанда, еркін бағдарламасы 9 қазанда өтеді.
