Магнитогорскінің «Металлургі» өз алаңында Владивостоктың «Адмиралынан» 2:5 есебімен ұтылып, Құрлықтық хоккей лигасының тұрақты маусымында күтпеген жеңіліске ұшырады.
Кездесудің бірінші кезеңінде есеп ашылған жоқ. Ал екінші кезеңде қонақтар төрт мәрте мергендік танытып, ойын тағдырын шешіп тастады. 23-минутта Иван Муранов көпшілік артықшылығын пайдаланып, «Адмиралды» алға шығарды. Көп ұзамай Владислав Цицюра басымдықты еселей түсті. Степан Старков «Металлургтің» бір голын қайтарды, алайда 32-минутта Энтони Камара есепті 1:3-ке жеткізді. 34-минутта Никита Ефремов төртінші шайбаны соқты, ал нәтижелі пас бергендердің бірі Қазақстан құрамасының шабуылшысы Максим Мусоров болды.
Үшінші кезеңде Данила Паливко алаң иелерінің екінші голын енгізді. Дегенмен Александр Волков бос қақпаға шайба салып, матч нүктесін қойды — 5:2.
Бұл ойында «Адмирал» қақпасын Қазақстан құрамасының қақпашысы Джелал-ад-Дин Амирбеков қорғады. Оған бұл матч ҚХЛ-дегі дебюті болды. Ал ұлттық құраманың тағы бір қақпашысы Никита Бояркин қосалқы құрамда қалды.
«Металлург» сапында қазақстандық қорғаушы Валерий Орехов пен шабуылшы Никита Михайлис те өнер көрсетті, бірақ екеуі де нәтижелі әрекетпен көзге түскен жоқ. Жеңістің арқасында «Адмирал» 11 ұпай жинап, Шығыс конференциясында сегізінші орынға көтерілді. «Металлург» 19 ұпаймен Шығыстағы көшбасшылығын сақтап қалды.
