Олли Уоткинс «Астон Вилладан» Сауд Арабиясының Премьер-лигасындағы «Аль-Хилал» клубына 51 млн фунт стерлингке ауысты.
30 жастағы шабуылшы жаңа командасымен үш жылдық келісімшартқа қол қойды. Ол «Вилланың» Премьер-лигадағы ең нәтижелі сұрмергені ретінде 91 гол соққан.
Уоткинс Бирмингем клубында алты жыл ойнап, Унай Эмери бапкердің тұсында команданың қарқынды өрлеуіне елеулі үлес қосты. Сол кезеңде «Астон Вилла» тұрақты түрде алғашқы алтылық үшін таласып, Еуропа лигасын жеңіп алды — бұл клубтың 44 жылдан кейінгі алғашқы еуропалық жүлдесі.
Ағылшын шабуылшысы өткен аптада «Брайтонға» қарсы Премьер-лиганың алғашқы ойынына қатысуға дайын емес екенін білдірген еді. Эмери кейін Уоткинс бұл үшін кешірім сұрағанын айтқан.
«Ең алдымен, менің “Астон Вилладағы” уақытым бұлай аяқталады деп ешқашан ойламадым және бұлай болуды мақсат етпедім. Бірақ соңғы алты жыл үшін шексіз алғысым бар. Бұл кезең мені тек ойыншы ретінде емес, адам ретінде де қалыптастырды», — деп жазды Уоткинс әлеуметтік желіде.
Ол сондай-ақ клубта бірге жұмыс істеген Дин Смитке, Стивен Джеррардқа және әсіресе Унай Эмериге алғыс айтты. Уоткинс клубтағы сәттерін, соның ішінде «Ливерпульге» қарсы 7:2 есебімен өткен ойындағы алғашқы голдарын, Чемпиондар лигасындағы кештерді және Ыстамбұлдағы ұмытылмас түнді ерекше атап өтті.
Осы жазда «Астон Вилладан» бірнеше ойыншы кетіп жатыр. Сонымен бірге клуб «Саутгемптонның» қорғаушысы Тейлор Харвуд-Беллисті 29 млн фунтқа алуға жақындап қалды.
