Қазақстандық боксшы Бек Нұрмағанбет Сауд Арабиясының Эр-Рияд қаласында өткен бокс кешінде мексикалық Маркос Родригеспен (21-4-1, 10 КО) қолғап түйістірді.
Жекпе-жек көпке созылған жоқ. Нұрмағанбет бірінші раундтың өзінде қарсыласын қыспаққа алып, нокдаунға жіберді. Артынша ол соққының қарқынын үдетіп, дәл соққылар сериясымен Родригесті ауыр нокаутқа түсірді.
Төреші есеп ашпастан жекпе-жекті тоқтатты. Медициналық бригада рингке дереу көтеріліп, мексикалық боксшыға көмек көрсетті. Оны ес жиғызуға бірнеше минут қажет болды.
Бұл — Нұрмағанбеттің кезекті сенімді жеңісі. Boxrec порталы оны екінші орта салмақтағы үздік боксшылар тізімінде 11-орыннан 9-орынға көтерді.
17 жеңіс, 15 нокаут еншілеген қазақстандық боксшының әлеуеті жоғары бағалануда. Енді оған өз шеберлігін шыңдап, чемпиондық белбеулер үшін таласа алатын деңгейдегі қарсыластар қажет екені айтылып отыр.
