Екі дүркін әлем чемпионы Санжар Тәшкенбай Астанада өтіп жатқан IBA Nomad турнирі алдындағы баспасөз мәслихатында 2028 жылғы Лос-Анджелес Олимпиадасына дайындалу жоспары туралы айтты.
— Олимпиадаға қатысу — кез келген спортшының арманы. Бұл спортқа келгендердің бәрі олимпиада чемпионы болуды қалайды. Бұл — менің де арманым. Бәрі Алланың қолында, болашақта не боларын білмейміз, бірақ мен бар күшімді саламын, — деді боксшы.
Санжар Тәшкенбайдың айтуынша, ол мұндай мақсаттан бас тартпайды. Дегенмен алдағы жолдың қалай қалыптасатыны әзірге белгісіз.
Қазіргі таңда Олимпиададағы ең жеңіл ерлер салмағы 55 келіден басталады. Ал Тәшкенбай 51 келіде жұдырықтасады, сондықтан 2028 жылғы басты додаға тікелей жолдама автоматты түрде берілмейді.
Осы өзгеріске байланысты оған 55 келіге ауысуға тура келеді. Бұл салмақта қазақстандық тәжірибелі боксшылар Сәкен Бибосынов пен Мұхмедсабыр Базарбайұлы да бәсекеде болуы мүмкін.
Айта кетейік, Санжар Тәшкенбай дәл осы турнирде филиппиндік 25 жастағы Нил Хакамоспен, яғни Джакамоспен, кездеседі. Бұл жекпе-жек оның кәсіпқой рингтегі ресми дебюті болмақ, ал боксшылар IBF Asia чемпионының вакантты белбеуін сарапқа салады.
