Америкалық еркін күрес шебері Бо Бассетт Астанада өткен 2026 жылғы әлем чемпионатындағы жеңісінен кейін пікір білдірді.
20 жастағы балуан өз жетістігін ұзақ жылғы еңбекпен байланыстырды. Оның айтуынша, жетістікке жетуіне отбасы, әкесі мен бапкерлері үлкен қолдау көрсеткен.
«Иә, мен мұны жасадым! Әлем чемпионы! Маған сенгендеріңіз үшін рахмет. Менің ішімде толық сенім мен нық сенім бар екенін білемін. Бұл — тек бастамасы!
Қиын жұмыс. Күн сайын. Менің отбасым, әкем, бапкерлерім. Ең бастысы, мен бұл спортты жақсы көремін және одан әрі жетілгім келеді. Иә, меніңше, менде қорқыныш жоқ. Бұл сенімнен және тынымсыз еңбектен келеді. Жеңіс пе, жеңіліс пе, тең есеп пе — мен бұл спортты жақсы көремін және әрдайым күлімсіреймін.
Мен өте көп жаттығамын. Өз елімде де, әлемде де кез келген адамнан көп. Бар күшімді саламын. Күн сайын. Мына ақ жейделі бапкер Фрейерден сұраңыз, ол сізге айтады. Міне, менің адамым!», — деді ол.
Бо Бассетт Астанадағы әлем чемпионатында 65 келіге дейінгі салмақ дәрежесінде алтын медаль иеленіп, турнирдің басты сенсациясын жасады. Әлемдік додаға алғаш рет қатысқан және ең жас спортшылардың бірі болған америкалық балуан ширек финалда экс-әлем чемпионы Абасгаджи Магомедовті 2:12 есебімен ұтылып жатып, 14:13 есебімен жеңді. Бұдан кейін ол жартылай финалда Абдулмажид Қудиевтен 12:2 есебімен басым түсіп, финалда армян балуаны Вазген Теванянды 9:1 есебімен тізе бүктірді.
Осыдан бірнеше ай бұрын Бассетт жастар арасындағы әлем чемпионатында (U20) жеңіске жеткен еді. Алайда 23 жасқа дейінгі балуандар арасындағы әлем біріншілігінде сәтсіз өнер көрсетті.
