Ресейлік боксшы Бешто Шавлаев 16 қазанда Грозныйда өтетін жекпе-жек алдында өз жоспарымен бөлісті. Бұл кездесуде ол қазақстандық Сапарбай Айдаровпен қолғап түйістіреді.
10 раундқа жоспарланған айқаста WBA Asia белбеуі сарапқа салынады. Жекпе-жек кештің қосалқы басты кездесуі болады.
Шавлаевтың айтуынша, бұл оның мансабындағы өте маңызды айқастардың бірі. Титулдың бәске тігілуі оған қосымша жігер бергенімен, оның басты мақсаты — шаршы алаңға шығып, өз боксын көрсету және жеңіске жету.
Ол Айдаровты тәжірибелі әрі мықты қарсылас деп бағалады және оны менсінбей қарауға болмайтынын атап өтті. Шавлаев қазір әуесқой және кәсіпқой боксты қатар алып жүргенін де айтты.
Кәсіпқой рингте тәжірибе жинап, алға жылжуды көздеп жүрген боксшының назары қазір тек 16 қазандағы кездесуге ауған. Алдағы жоспарлар туралы кейін ойланатынын жеткізді.
Шавлаев қыркүйекте Саранскіде Ресей чемпионатында 80 келіге дейінгі салмақта алтын медаль жеңіп алған. Сондай-ақ ол 2024 жылы Ресей кубогы мен БРИКС ойындарында топ жарған. Кәсіпқой рингтегі соңғы ресми айқасын ол 2025 жылдың желтоқсанында Санкт-Петербургте өткізіп, өзбекстандық Исломбек Муминовты жеңген.
Айдаров кәсіпқой шаршы алаңда әлі жеңілмеген боксшы саналады. Ол мансабы барысында негізінен Қазақстанда жұдырықтасып, сондай-ақ Үндістан мен Ганада да өнер көрсеткен.
