Қазақстанның олимпиада чемпионы Елдос Сметов Абу-Дабиде өтетін Grand Slam турниріндегі алғашқы қарсыласын білді.
60 келіге дейінгі салмақта сынға түсетін қазақ дзюдошысы жарысты бірден бірінші айналымнан бастайды. Оның алғашқы қарсыласы — Тәжікстан спортшысы Меҳрзод Суфиев.
Бұл кездесуде жеңіске жеткен спортшы екінші айналымда Бразилиялық Диего Исмаэль мен Қытай өкілі Ма Юлинь арасындағы белдесудің жеңімпазымен жолығады.
Сметовтің соңғы ірі жарысы 2026 жылғы жазғы Азия ойындары болды. Айти мен Нагояда өткен додада ол 60 келі салмақта финалға дейін жетіп, шешуші белдесуде жапониялық Хаято Кондодан ұтылып, күміс медаль алды.
Abu Dhabi Grand Slam-2026 турнирі 29–31 қазан аралығында өтеді. Елдос Сметовтің салмағында барлығы 26 спортшы бақ сынайды.
