Ташкентте (Өзбекстан) өткен IBA Nomad 16 турнирінде кештің басты жекпе-жегі өтіп, қазақстандық Бекжан Бакиров ресейлік Мурад Халидовпен реванш кездесуін өткізді.
Жекпе-жек ММА қолғаптарымен бокс ережесі бойынша ұйымдастырылып, бес раундқа жоспарланған болатын. Айқаста Nomad FC ұйымының аса ауыр салмақтағы чемпионы Халидовтың белбеуі сарапқа салынды.
Бәсеке ұзаққа созылған жоқ: екінші раундтан кейін Бекжан Бакиров кездесуді жалғастырудан бас тартты. Осылайша, Мурад Халидов титулын сақтап қалды.
Бұл — Халидовтың лигадағы үшінші жеңісі, оның рекорды енді 3-0 болды. Ал Бакиров үшін бұл үшінші жеңіліс болып тіркелді, оның көрсеткіші 3-3-ке түсті.
Екі спортшы бұған дейін де рингке шыққан еді. Өткен жылдың мамыр айындағы алғашқы кездесуде де Мурад Халидов төрешілердің бірауызды шешімімен жеңіске жеткен болатын.
