Халықаралық шайбалы хоккей федерациясы (IIHF) әлем чемпионатының элиталық дивизионына қатысатын құрамалар санын 16-дан 24-ке дейін көбейту мүмкіндігін қарап жатыр.
Бұл бастама ұйымның жартыжылдық конгресінде талқыланды. Ұсынысты IIHF-тің аға вице-президенті Петр Бриза көтеріп, сайлау науқаны кезінде бірнеше ел басты хоккей турнирінің географиясын кеңейту мәселесін қозғағанын айтты.
Жоспар мақұлданса, элиталық дивизионға екінші эшелондағы командалар да өтуі мүмкін. Солардың қатарында Румыния, Литва және Оңтүстік Корея аталады.
Қазақстан құрамасы үшін мұндай өзгеріс элитада қалу бәсекесіне тікелей әсер етуі ықтимал. Сонымен бірге турнир форматы мен күнтізбесін қайта қарау қажет болады.
Әзірге бұл бастама бойынша түпкілікті шешім қабылданған жоқ.
