Ресейлік комментатор Максим Янчевский Қазақстанның бірінші ракеткасы Елена Рыбакинаны «қар ханшайымы» деп атап, US Open-2026 додасындағы салқынқанды ойынына жоғары баға берді.
Ол Рыбакинаның турнир бойы мінез көрсетіп, қысымға қарамастан сабыр сақтай білгенін айтты. Комментатордың сөзінше, қазақстандық теннисші үшін матчтың қай жерде өткені маңызды емес: ол Уимблдондағыдай да, айқайға толы US Open-де де бірдей сенімді ойнайды.
«Елена Рыбакина — жаңа патшайым, әлемнің бірінші ракеткасы. Осы турнирді қандай салқынқанды өткізгеніне қараңыз. Шын мәнінде, қар ханшайымы, мұздай нәзік ару. Оның ойынына мүлде бәрібір: бұл Уимблдонның тыныш атмосферасы ма, әлде US Open-нің у-шу алаңы ма — оған бәрібір, өйткені ол өте жоғары деңгейде ойнайды», — деді Янчевский.
Комментатор финалда Арина Соболенкоға қарсы өткен кездесуді де бөлек атап өтті. Оның пікірінше, Рыбакина екінші сетте жеңіліп қалғанына қарамастан, күшін дұрыс бөліп, шешуші сәтте шоғырлана алды.
«Финалда да ол шынымен тартып алды. Екінші сеттен кейін қайта оралды. Бірінші доппен дәлдігі онша жоғары болмағанымен, екінші доппен де өте жақсы жұмыс істеді, Аринаны қысымда ұстай білді. Маған ең маңыздысы — дәл керек кезде өзіңді сақтау керегін түсіну сияқты көрінеді», — деді ол.
Янчевский бұған дейін Рыбакинаның Цинциннатидегі турнирде жарақатына байланысты Ига Швёнтекке қарсы ширек финалдық матчтан бас тартқанын да еске салды. Соған қарамастан, қазақстандық теннисші US Open-де бәрін артта қалдырып, титулға дейін жетті.
Турнир барысында Рыбакина Теа Фродинді, Джессика Бузас Манейроны, Юлия Стародубцеваны, Наоми Осаканы, Чжэн Циньвэньді және Кори Гауффты ұтып, финалда Соболенконы 6:4, 5:7, 6:2 есебімен жеңді. Бұл жеңіс оның «Үлкен дулыға» турнирлеріндегі үшінші титулы болды, ал 14 қыркүйекте ол алғаш рет WTA рейтингісінің көшін бастады.
