Чарлотта Хеншоу ауруханадан шыққанына 11 күн өтпей әлем чемпионы атанды

Ұлыбританияның параканоэ шебері Чарлотта Хеншоу целлюлиттен кейін ауруханадан шыққанына екі апта толмай жатып, әлем чемпионатында кезекті алтын медалін жеңіп алды.

39 жастағы спортшы аяқ тұсындағы жұқпалы қабынуға байланысты ем қабылдаған. Осы дерттен кейін ол Польшадағы Познань қаласында өткен дода қарсаңында судағы жаттығуға шыға алмаған.

Соған қарамастан, сенбі күні өткен KL2 200 метрлік финалда Хеншоу мәреге екінші орын алғандардан үш секундтан да көп уақыт бұрын жетіп, осы бағдарламадағы сегізінші әлем чемпионы атанды. Бұған дейін ол VL3 сыныбында төрт мәрте үздік шыққан.

«Жеңіп алған атақтарымның ішінде бұл мен үшін ең қымбаты шығар, өйткені бір апта бұрын мұнда болатынымды да білмедім», — деді ол.

«Қысымды азайтып, өз денеме және тәжірибеме сенудің де пайдасы бар шығар. Мен ұзақ уақыт бойы ең жоғары деңгейде бақ сынап келемін. Іс оңға баспай, дайындық кейінге шегерілген сәттерде әрбір тәжірибеңе сүйенуге тура келеді», — деді Хеншоу.

«Он бір күн бұрын мен ұшаққа отырамын деп ойламадым. Сондықтан мұнда келіп, жарысқа қатысып, титулымды қорғағаным мен үшін ерекше қуаныш. Бұл жеңістің мәні өте зор», — деп қосты ол.

Қос аяқтан айырылған Хеншоу 2017 жылы жүзуден параканоэге ауысқаннан бері Паралимпиадада үш дүркін чемпион атанды.

Жұма күнгі іріктеу жарысынан кейін ол Instagram желісінде соңғы бір аптада болған жағдайдың өзіне көп нәрсені ұқтырғанын жазды. Оның айтуынша, нәтижелер, рейтингтер, уақыт пен күтілімге тым байланып қалу оңай, алайда ұзақ мерзімді саулық бәрінен маңыздырақ.

Познаньдағы жарыста Хеншоудың командаласы Хоуп Гордон KL3 200 метрде алтын медаль жеңіп алса, Стюарт Вуд ерлер арасындағы VL3 сынында қола жүлдегер атанды. Гордон үшін бұл — KL3 санатындағы алғашқы әлем чемпионы атағы. Ол бұған дейін VL3 сынында екі рет жеңіске жеткен болатын.