Екі дүркін әлем чемпионы Санжар Тәшкенбай Астанада өткен IBA Nomad турниріндегі жеңісінен кейінгі баспасөз мәслихатында 2026 жылғы Азия ойындарына бармайтынын айтты.
«Азия ойындарына бармаймын, менде ол салмақ жоқ», — деді спортшы.
Кеше Астанадағы турнирде Тәшкенбай кәсіпқой рингтегі дебюттік жекпе-жегін филиппиндік Нил Хакамосқа қарсы өткізді. Бірінші аса жеңіл салмақта өткен 10 раундтық бұл кездесу бокс кешінің басты айқасы болды.
Жекпе-жек барысында қазақстандық боксшы бесінші және сегізінші раундтарда қарсыласын нокдаунға жіберді. Қорытындысында төрешілердің бірауызды шешімімен жеңіске жетіп, IBF Asia чемпионы атағын иеленді.
Тәшкенбайдың өзіне ыңғайлы жеңіл салмақ дәрежесі — 50 килограмға дейін — 2025 жылдың қыркүйегінде ХОК пен World Boxing реформалары кезінде Олимпиада және Азия ойындары бағдарламасынан алып тасталған еді. Осы шешімнен кейін ерлер арасындағы ең жеңіл олимпиялық салмақ 55 килограмнан басталады.
