Қазақстан кубогының хоккейден өткен екінші жартылай финалында қарағандылық «Сарыарқа» мен «Ақтөбе» кездесіп, тартысты ойында 3:2 есебі тіркелді.
Бірінші кезеңде командалар гол соға алмады. Ал екінші жиырмаминуттықта «Сарыарқа» үш шайба салып, басымдықты өз жағына аударды.
31-минутта Эдгарс Сиксна Александр Борисевич пен Данила Карабаньның пасынан кейін есеп ашты. Арада үш жарым минут өткенде Борисевич Владислав Никулин және Владислав Дюкаревтің көмегімен артықшылықты еселей түсті.
Екінші үзіліске бес секунд қалғанда Карабань үшінші шайбаны енгізді. Бұл голға Иван Степаненко мен Владимир Волков нәтижелі пас берді.
Қорытынды кезеңнің басында Максим Базанов көпшілік құрамда көзге түсіп, «Ақтөбенің» есептегі айырмасын қысқартты. Оған Захар Захаров пен Ян Хоменко пас берді. 58-минутта Владислав Комаров екінші шайбаны соқты, алайда ақтөбеліктер таразы басын теңестіре алған жоқ.
Осылайша, «Сарыарқа» Қазақстан кубогының финалына шықты. Шешуші матчта қарағандылықтар бұған дейін Рудныйдың «Горнягын» 5:2 есебімен жеңген өскемендік «Торпедомен» ойнайды.
