Бапкер Махачевтің Рахмоновтан қандай артықшылығы барын айтты
Ресейлік бапкер Армен Гулян Ислам Махачевтің UFC-дің жартылай орта салмағында неге басым түсетінін түсіндірді. Ол қазақстандық Шавкат Рахмоновты да осы дивизиондағы табиғи салмақ иелерінің бірі ретінде атады.
Ресейлік бапкер Армен Гулян Ислам Махачевтің UFC-дің жартылай орта салмағындағы қарсыластарына қандай қырымен басым түсетінін айтып, оны осы дивизиондағы басқа мықтылармен, соның ішінде Шавкат Рахмоновпен салыстырды.
Гулянның пікірінше, Махачев қарсыластарына техникасы мен жекпе-жек IQ-і жағынан алда келеді. Алайда жартылай орта салмақта физикалық тұрғыдан бәсеке әлдеқайда қиындай түскен.
«Біз Махачевтен жеңіл салмақтағыдай басымдықты көріп отырған жоқпыз. Жартылай орта дивизионда физика басқа. Ислам бұл салмақтың табиғи өкілі емес сияқты сезіледі, ал Гэрри, Шавкат Рахмонов және басқа да мығым жігіттер — осы салмаққа сай спортшылар. Ол шеберлік жағынан қарсыластарынан озық. IQ жағынан да басым. Бірақ физикалық тұрғыдан бәсекелесу оған қиын», — деді Гулян.
Сондай-ақ ол Махачевтің ирландиялық Иэн Мачадо Гэрримен болған жекпе-жегін де талдап шықты. Бапкердің айтуынша, чемпион үшінші раундта әдейі қарқын бәсеңдетіп, соңғы бөлікте күшін үнемдеуі мүмкін.
16 тамызда Махачев UFC 330 турнирінде Гэрриді төрешілердің бірауыздан шығарған шешімімен жеңіп, жартылай орта салмақтағы чемпиондық белбеуін қорғап қалды.