Мейірім Нұрсұлтанов WBC белбеуі үшін Хесус Рамос-кіші-ге қарсы шығады
Қазақстандық боксшы Мейірім Нұрсұлтанов келесі жекпе-жегінде америкалық Хесус Рамос-кіші-ге қарсы шығады. Жекпе-жек WBC орта салмақ дивизионындағы уақытша әлем чемпионы белбеуі үшін өтеді.
Қазақстандық боксшы Мейірім Нұрсұлтанов (20-0, 11 нокаут) келесі кездесуінде америкалық Хесус Рамос-кіші-мен (24-1, 19 нокаут) рингке шығады. Жекпе-жек 19 қыркүйекте АҚШ-тың Калифорния штатындағы Сан-Диего қаласында, Pechanga Arena алаңында өтеді. Қазақстан уақыты бойынша бұл кездесу 20 қыркүйек күні таңертең басталады, ал тікелей эфирді DAZN арнасы көрсетеді.
Жекпе-жекте Рамостың иелігінде тұрған WBC-тің орта салмақтағы уақытша әлем чемпионы белбеуі бәс тігіледі. Кештің басты жекпе-жегінде Айзек Крус пен Нестор Браво WBC-тің бірінші жарты орта салмағындағы уақытша чемпион атағы үшін өз күштерін сынайды, ал Нұрсұлтанов пен Рамос арасындағы кездесу кештің екінші басты жекпе-жегі болады. Іс-шараны Premier Boxing Champions промоушені ресми түрде жариялады.
Мейірім Нұрсұлтанов соңғы рет 2023 жылы рингке шыққан еді. Сол кездесуде ол Өзбекстанның Ташкент қаласында чилиялық боксшы Хулио Аламосты (16-3, 9 нокаут) төрешілердің бірауыздан шешімімен жеңіп алды.
Хесус Рамос-кіші өз кезегінде өткен жылдың желтоқсанында АҚШ-тың Сан-Антонио қаласында рингке шығып, отандасы Шейн Мозли-кішіні (23-5, 13 нокаут) төрешілердің бірауыздан шешімімен жеңген болатын.