Марал Толепберген жастар Олимпиадасында Қазақстанға кемі қола медаль әкелді
Қазақстандық боксшы Марал Толепберген Дакардағы жастар Олимпиадасында ширек финалда жеңіске жетіп, кемі қола медальді қамтамасыз етті. Бұл — Қазақстан құрамасының бокстағы үшінші жүлдесі.
Дакарда өтіп жатқан 2026 жылғы жастар Олимпиадасында қазақстандық боксшы Марал Толепберген ширек финалдық жекпе-жегінде жеңіске жетті.
54 келіге дейінгі салмақта өткен кездесуде Толепбергенге Мысыр өкілі Хаджер Эльшербини Вахба қарсылас болды. Үш раундтың қорытындысы бойынша төрешілер жеңісті қазақстандық спортшыға бірауыздан, 5:0 есебімен берді.
Осы нәтижемен Марал Толепберген жартылай финалға шығып, кем дегенде қола медальді өзіне қамтамасыз етті.
Бұл жүлде Қазақстан құрамасы үшін бокстан осы ойындардағы үшінші медаль болды. Бұған дейін Ақнұр Тұрсынғали 57 келіге дейінгі салмақта, ал Бибарыс Аширбай 70 келіге дейінгі салмақта медаль алған еді.
Бокс жарыстары Дакарда 7-12 қараша аралығында өтіп жатыр. Жарыста барлығы он медаль жиынтығы сарапқа салынады: ұлдар арасында бесеу, қыздар арасында бесеу.