«Панатинаикос» «Ариске» де есе жібермей, жеңісті сериясын жалғастырды
Грекия Кубогының төртінші турында «Панатинаикос» «Аристі» 2:1 есебімен жеңді. Афина клубы бұл табыстың алдында алматылық «Қайратты» да ұтып, қатарынан бесінші рет жеңіске жетті.
Грекия Кубогының төртінші турында «Панатинаикос» өз алаңында «Ариске» қарсы ойнап, 2:1 есебімен жеңіске жетті.
Кездесудің 10-минутында Сотирис Контурис Имран Лузаның пасынан кейін есеп ашты. Екінші таймда, 65-минутта, Тино Кадевере таразы басын теңестірді. Алайда ойын соңына қарай «Панатинаикос» қайта алға шығып, жеңісті жұлып алды.
89-минутта Эльмин Растодер Георгиос Кирьякопулостың пасын тиімді пайдаланып, шешуші голды соқты.
Осылайша, Афина клубы жеңісті жолын жалғастырды. Бұған дейін ол 22 қазанда Лига конференциясының жалпы кезеңінде алматылық «Қайратты» өз алаңында 5:1 есебімен ұтқан еді. Одан кейін 25 қазанда Грекия чемпионатында «Волосқа» 1:0 есебімен жол бермеді.
Бұл нәтиже «Панатинаикостың» барлық турнирдегі қатарынан бесінші жеңісі болды. Келесі ойынын команда 1 қараша күні Грекия чемпионатында АЕК-ке қарсы өткізеді. 5 қарашада Афина клубы Лига конференциясының жалпы кезеңінде Софияның ЦСКА командасын қабылдайды.